7 oct 2011

LUIS SALAS RIAÑO Y UN CUADRU

Anque  pue dicise que nin pinté nin pinto nada de nenguna manera, l´otru día flipé en colores -nel sentíu más literal -. Ello fue que Luis Salas Riaño nel so blog sacaba un cuadru míu de 1982, esti que veis na foto (Paseo por el muelle) y del que yo nun tenía nin remota idea, nin siquiera sabía qu´él lu tuviere. Nunca fue nengún enfotu míu lo de pintar, pero por más qu´otros se dediquen a robar o matar, nun ta nada mal como afición.
Pa mi esto fue un regalu de los que más presten polo inesperao, y mui importante, ye cásique como cuando ún alcuentra a un pariente que va trenta años que nun ve y nun sabía d´él. Con Luis pasábame otru tanto de lo mesmo o aprosimao.
Conocímonos nel añu 79 o 80 más o menos. Él ye d´Infiestu y yo vivía daquella na casa del mio güelu paternu nel conceyu Piloña. Amás tuvimos dos años, xunto con Carlos González Espina, compartiendo un pisu d´estudiantes na Avenida de Torrelavega n´Uviéu, cuando ellos con José Luis Gª Martín y Víctor Botas entamaben cola tertulia del Oliver.
Tertulia Oliver (1983). De izda. a dcha.: Luis, Xuan Bello, Antón García y Víctor Botas. D´espalda, J.L. Gª Martín. (Archivu de Antón García).
Creo que daquella yá andaben tamién per allí, si nun m´equivoco, Antón García y Xuan Bello, ente otros. Fue y ye sin dulda nenguna la tertulia lliteraria más importante d´Asturies d´estos últimos tiempos, tanto en cantidá como en calidá.
Depués qu´acabemos d´estudiar nun supi muncho d´él hasta qu´un día, va una temporada, vi que dalguién entraba nel mio blog dende Noruega y al averiguar quién yera, descubrí´l suyu Artes lewinskianas, que vos recomiendo a toos anque seya sólo por placer, por rise un poco o por terapia tamién. Ye ún de los escritores que conozo, más arriesgaos en tolos sentíos, nun-y importa, nin-y importó nunca entrar y xorrasquiar nos terrenos más delicaos del cuerpu (creencies, sexu,....) tanto en castellano como n´asturiano. Ye inxeniosu y irreverente como tolo qu´escribe, pero namás la punta (valga la expresión) del iceberg d´una persona que nel tratu diariu derrama xenialidá per tolos llaos. Ye una pena que´l país nel que vive nun nos quede más de pasu.
Na última visita que fixo l´enorme poeta Gamoneda a La Cuenca, primero nel actu públicu y depués na cena en Casa Adela en Lada, dexónos clares polo menos tres coses, que yo recuerde. En primer llugar qu´un poeta anque naz con una serie de cualidaes pa ello, tien que facese y muncho. Segundo que la poesía ye ritmu, anque por cuenta de les traducciones d´otres llingües mayormente, fue perdiéndose últimamente esta condición d´una manera significativa y por último que la poesía nun ye ferramienta pa cambiar nin pa iguar nada. Coses éstes les tres que yo sospechaba de va tiempu y que comparto dende´l mio modestu puntu de vista.
Tamién creo que Luis seya partícipe d´estes tres premises, polo menos sí lo ye na práctica del so llabor lliterariu. La obra de Luis nun tien límites nin fronteres, quiciás tamién seya esto la causa de qu´un rapaz d´Infiestu tea de profesor d´español con acentu asturiano n´Asker.
Aparte d´acercanos la tradición nórdica a l´asturiana, l´erotismu y la pornografía son dos de los pegollos de la obra lliteraria de Luis Salas Riaño: el sentimentalismu de Prévert o los versos de Verlaine y Apollinaire traducíos por él, o dellos relatos de "Ateyavana", amás de los sos poemes de "La llingua encesa", cuenten con toles posibilidaes -y toles postures- d´un enorme y ricu repertoriu sexual y humanu.
Póngovos aquí un poema que pertenez al poemariu "La llingua encesa" sacáu por José Luis Argüelles na antoloxía billingüe de poetes asturianos Toma de tierra que se titula “El tocador”. Podéis apreciar el procuru que punxo Luis tanto na versión asturiana como na castellana de manterner les cualidaes rítmiques d´una y otra llingua.

"Pigacia´l tocador col so cortexu                 
d´imáxenes. Un cuadru Miguel Ánxel,             
una xana que desnudó a un arcánxel,               
la semeya y la flor. Pasa´l reflexu                    
d´una escura figura d´aire vieyu                       
y desahuciáu que se despide. Olvida               
qu´a nun tardar acabará la vida                       
con él, y que la sombra nel espeyu                                
ye d´él, y que la estela que lu dexa                  
mudu pa siempre yá y entretomáu                   
ye l´últimu aliendu entrecortáu                         
d´esa sombra furtiva que se quexa                  
y se va. Pero en vanu. Tercamente
aquel pasáu siguirá presente. "  

"Dormita el tocador con su cortejo
de imágenes. Enfrente un Miguel Ángel,
una ninfa que desnudó a un arcángel,
la foto y una flor. Pasa el reflejo
de una oscura figura de aire viejo
y vacío que se despide. Olvida
que a no tardar acabará la vida
con él, y que la sombra en el espejo                
es suya, y que la estela que lo deja
para siempre en silencio y empañado
es el último aliento entrecortado
de esa sombra furtiva que se queja
y se va. Pero en vano. Tercamente
aquel pasado seguirá presente."

2 comentarios:

  1. Hola MIguel. Gracies pola ditirámbica semblanza. Non se merez. El to cuadru (que me lu regalasti, non te lu robé), seguramente por habeme metíu na secta de García Calvo, del que tú facís proselitismu naquel intonces. Lo ciertu ye que acompañóme la friolera de trenta y picu d`años (¡vaya tela!) en toles mios residencies pel anchu mundu.
    Comu vi que andabes xorrando pel mio blog diome por sacalu a ver si lu reconocís. Quién me diz a mí que ahora que yes famosu non me voy facer con una fortuna.
    Bueno Miguel, préstame munchu que te dedicares a la poesía (anque la pintura siempre hay tiempu pa retomala). Resulta que desde que Carlos me faló de ti y te lleí, dixi yo pa mí, hostia, la suerte que tengo yo de ser amigu de los tres meyores llíricos presentes, un suponer: Antón García, Xuan Bello y tù. Asina que al que a buen árbol s`arrima. A ver si se me apega algo.
    Díxome Carlos tamién que habíes quedáu primeru tú en non sé que premiu,y yo segundu (yo non me presento a premios), intós pensé que la mio plata fue completamente merecía y de balde. La verdá ye que de lo que yo conozco que s'escribe n'asturianu yeres l'unicu que tien daque nuevu que dicir, y dicilo bien, y non ye por que seas tú, ye por que ye verdá, y si non que lo diga Borges.
    Además tú tamién cumples colos preceptos de Gamoneda, que yo asumo, lo del ritmu y sobre tou lo de que la poesía non val pa nada (que digamos). Y otru cuartu que pondría yo: saber facer sonetos.
    Non creo que te dieres cuenta, pero nel poema esti que sacasti equí, el cuadru de Miguel Angel que se noma ye'l tuyu, que taba colgáu nel mio cuartu nuna ocasión que perdí una moza. Y consérvolu, a parte de la fortuna que pueda ser, como lietmotiv de les mios llaceries y como alcordanza de andances estrañamente llontanes nel tiempu pero non na memoria.
    Un abrazu, Luis.

    ResponderEliminar
  2. Queríu Luis:
    Antes que nada gracies poles hiperbóliques y poco merecíes pallabres que me dediques, siempre dixi qu´hai que tener buenos amigos pa que te dean un pocu bombu, y yo tengo esa suerte como bien se pue ver. Lo que más siento ye lo de la moza, pero si´l cuadru sirvió pa daqué, pues nada, en buenes manes ta(nin siquiera sospechaba lo del sonetu, porque Miguel Ánxel namás me lo llama mio madre, pero ye un doble placer) Fue la meyor sorpresa de los últimos tiempos volver a topate nesti blog tuyu y una suerte poder lleer coses tuyes d´estes.
    De Gª Calvo dalgún día falaré/falaremos llargo y tendío (ún de los grandes).
    Un saludu bien grande y a la espera de más gregueríes d´eses tuyes y desnudos pensamientos interiores y esteriores.

    ResponderEliminar